خفوها اشوي ياشباب..

خفوها اشوي ياشباب..

بعض الشباب >>>> متهورين ..
ما اعمم بموضوعي عن الكل لكن الاغلبية عندنا كذا ..
كل يوم توصلنا اخبار عن الوفيات واغلبها من الحوادث اللي تكون اسبابها :

1- سرعة جنونية .
مدري هذولا يبغون يثبتون ذاتهم بالسواقة ؟ ..
او عاجبهم الهواء العليل ويبغون يحركون شعرهم (الانمي) ؟؟؟

2- تفحيط .
يعني الا يبغون يرقصون بالسيارة !!!!!
ندري ان عندكم طاقات يالشباب لكن صرفوها في امور تنفعكم مش امور تودي بحياتكم وحياة غيركم ..
روح اعمل رياضة تعطي فيه لجسمك شكل جميل ومتناسق>>> مثال لـ صرف الطاقات.

اقولكم قصة واقعة من كم يوم :
كان شاب شخصية له سمعة اكثر من نظيفة ...
عاقل لابعد الحدود (اثاريه من تحت لتحت) يعني يبغى يطلع طاقاته ويتمنى لو الشارع يفضاله يوم ..
وبالفعل وقت الفجر والناس تصلي هو استغل هالوقت الفاضي ولعب بالسيارة ..
(قال في خاطره هي مرة عن نفسي بس) وبالفعل هالمرة هذه صدم واحد بريء راح فيها ..
هع .. القهر ان هالبريء هذا يكون صاحبه الروح بالروح ومن ايام الطفولة... >>>>لاتعليق
الان هو يعيش حالة الندم اللي ما اعتقد انها ما راح تفارقه .

من اسباب الحوادث بعد :
3- اتخاذ التقنية في لعب اطفال ..
تشوف ثنين يسرعون جنب بعض .. وش سالفتهم ؟
سباق !!!!
واللي يموت اول هو الفايز .

تشوف ثنين جنب بعض عكس الاوليين يمشون ببطء شديد .. شيسوون ؟
يسولفون !!!!
وكأن الشارع بـ أسم ابوهم ..

4- هرن سيد ..
تقول احول ؟ ... يعني ما تعرف انك تمشي في الاتجاه العكسي ؟
لهذه الدرجة هذا ضامن حظه في الدنيا ؟
والقهر انه يمشي هرن سيد وبسرررررررعة غبية . او بالاحرى بـ سرعة حولا ..

5- مجاكرة الاشارة الحمراء ..
وكان الشباب عند الاشارة الحمرة حرمة بتولد ..
ليه العجلة .. وايش وراكم ؟
صدق الشيخ المهاجر لما قال : (لو تقوله صارت صلاة يقولك اصبر اشوي .. وفي السيارة مافي صبر .. الوقت عنده مهم جدا ) ..

وغيرها كثير من الاسباب اللي تخلي الواحد يقول ليتهم ما اخترعوا السيارة ..

اخواني الشباب ...
اذا انت شايف ان نفسك رخيصة لهذه الدرجة فليه تتضايق اذا جاتها اهانة ؟
واذا كانت رخيصة عندك فهي غالية عند اهلك .. اذا انت تحبهم حافظ عليها ..
اذا كانت روحك رخيصة فالناس حولك مش بطيخ تلعب فيها مثل ما تبغى ..
يعني لاتكون اناني ..
يمكن يوم بتهورك تودي بحياة اغلى ماعندك ..
انت شخص متحضر وعقلاني ورجال فعلا يستحق انه يمسك سيارة يقودها فليه تخلي هالشي عبء عليك ؟
.
.
شي مؤسف يامثقفين .. نسبة الحوادث في الاحساء زايدة عن اللزوم ..
وش الي راح يفيد معكم ؟
العمر الخاص للقيادة وتم تحديده ..
الرخصة الخاصة بالقيادة وتم تحديدها ..
لو يفتحون لكم مدراس خاصة بالقيادة متاكدة هم نسبة الحوادث تزيد ..
..حتى الدبابات والمواطير ماسلمت من الحوادث ..

تبغون الغرب يضحكون عليكم .. يقولون العرب مش لوجه سواقة ؟
حرام عليكم كل يوم نسمع حادث صار .. وكم واحد في العناية المركزة هذا اذا ما تعوق .. هذا اذا ما مات ..

من اليوم ابدأ اخي الشاب .. اذا انت تستخدم اي اسلوب من اساليب الطيش بالسيارة فاتركه من اليوم (قبل ماتندم)وابدأ مع نفسك صفحة جديدة تكون فيها الشخص المثالي والقدوة للمتهورين .. يمكن يوم يعجبهم اسلوبك وتكون انت مثالا يحتذى به ..

همسة في اذانكم : اذا كانت الاحساء مرشحة لاجمل طبيعة .. فليه مايكون شعبها افضل شعب سلوكاً؟؟؟ [center]

مشاءالله على الموضوع صحيح ان كلامك حكم بصراحه موضوعك واقعي بس وين الي يسمع وينفذ للأسف مافي

يسلموووو عالموضوع المفيد

يسلموووو ع المرور الحلوو